Biciidka ~ Tixmagabe

Meel bur cawsa leh

Oo biyo u dhaw

Baadi goobyoo

Biciidkuba waa

(hees-hawleed Lo’da lagu waraabiyo)

*Xog ku saabsan Biciidka*	Labka	Dheddigga
Joogga	1.2 M	1.2 M
Culayska	150 Kg	145 Kg
Culayska uu ku dhasho	7 Kg	7 Kg
Inta uu naaska jaqo	6 Bilood	6 Bilood
Da’da qaangaadhnimada	3 Sano	3 Sano
Sidka	-------	6- 9 Bilood
Inta ilmo ay dhasho markiiba	-------	1 Ilme
Da’da noloshiisu gaadho	10 sano	10 sano

X.S: (http://www.qorahay.com/wax-kabaro-khayraadka-dhulkaaga-hooyo-ee-ogaadeeniya/)

Biciidku ugaadha duurka ee waawayn ayuu ka mid yahay. Wuxu ku noolyahay howd, sudaha iyo meelaha aan dhirta badnayn ee cawska badan, dooga iyo bilcilka ayuu daaqaa. Waa bahalka ugu geesaha fiiqan xayawaanka. Geesahaas oo gaadha ilaa hal mitir (1M). Waxa xusid mudan, in dheddigga geesaheedu ka yara gaabanyihiin kuwa labka. Dheddigiisu waa biciid, labkuna waa Saryan. Dhashiisu marka ay yaryartahay, kuwa dheddig waxa la yidhaadaa Dheddigo, labkuna waa Sawaro. Tirada mar is raacda ama wadartiisa Yahaab qamaamalay ayaa loo yaqaan.

Saryanku marka ay Sawarradu waawaynaadaan ee ay koraan wuu saaraa (eryaa) wuuna sahamiyaa, wuuna is raad guraa oo haddaad ku sugto meel uu saaka soo maray wuu kugu soo noqonayaa oo wuu soo laaban ogyahay. Sidaa darted ma aha xawaanka hadhsada ama hogta, waa tii Soomaalidu hore u tidhi ‘’wallee Saryan gooni-daaqi, ma hadhsado’’. Saanta biciidka waxa laga jeexaa suunka Maddannado oo la siisan jiray sabeeno idaha ah muddooyinkii hore.

Biciidku sida Goodirka ayuu u nabad jecelyahay, inta badanna waxa lagu arkaa iyada oo ay ku soo eertaan[1] ugaadha yaryar ay Deerada iyo Sakaaradu ka mid yihiin. Waxa uu leeyahay fool (weji) caddaan iyo madow isku dhafan, aadna u bilicsan. Midabkiisu waa caddaan xigeen dhinacyada iyo caashana ku leh liidad madmadow, bogga hoose waa caddaan xaruuri ah. madaxa waxa uu aad uga egyahay riyaha, qaarka dambena Dameeraha ayuu uga egyahay, sayntiisa dambena waa ta Dameeraha oo kale. Biciidku xilliga barwaaqada ayuu rimaa. Sidoo kale, Biciidka qaan gaadhka ahi jooggoosa waxa lagu beegaa 120 Cm. waxa uu ku jiraa xayawaanka kooxaha oo waxa wada socon kara 10 – 50 Yahaab qamaamalay ah oo Biciid ah. inkasta oo badanaa la arko lab keligii noole (sagan daaq ama gooni daaq) ah.

[1] Tibadaan, u yimaadaan. Agtiisa yimaadaan