Halqabsiga geela (Tuducyo geela ka hadlay)

VI. Halqabsiga geela (Tuducyo geela ka hadlay)

“Hal aan tebayay hawraar murti le, heeso iyo maanso
Hal beeggiyo tixaa lagu cabbiro, meesha ku holcaysa
Halqabsiyo haddaan lagala hadhin, hoodo laga waaye
Aduun baa ku hawshoodayoon, haakah lagu odhane”
(Hummaag, Tixmagabe)


Sida geel harraadoo wax badan, hawdka miranaayay
Oo haro la soo joojiyoo, kuraygu heegaayo
Oo hanadadii raaci jiray, laba u heesayso
Oo hoobey loo qaaday iyo, hees walwaaleedka
Kolkaad Hodon tidhaadaanba, waan soo hinqanayaaye
(Cilmi-boodheri)


Geeluba ugaasooy kolkuu, ayda miranaayo
Abeerkiisa naaxiyo markuu, aaranku is waayo
Isaguba ma kala aammusee, waysu ololaaye
(Cabdi-gahayr)


Halkuu raysin geel ugu fadhiyo, nimanka reer Rooble
Ee uu riij-maan ku yahay, raaf yarow adhigu
Maad i raaci kayn roobleh baan, ramad ku maalaaye
Mise rabadinkaasaad fadhiyi, lagugu raad qaaday
*
Naa toddobuu ahaa geelayagu, tiriyo waawayn
Laba way takarisoo shan baa, taagan xeradii
Maxay iga tasoobaan nirguhu, waaba taa qudha’e
(…………..)

Kuman baa ka dhalay geelayaga, kor u hayaankiiye
Nirgihiisa lama koobi karo, kayn hadduu galo’e
Koramada dhex daaqaana waa, kun iyo dheeraade
Aan karuurka wada doonanee, kaba soo qaado
Haddii kale se kadabkeed go’yeey, kuudud qolodiina
(Gabyaa aan magaciisa la hayn)

Waxa geela qaaliga ka dhigay, qiimuhuu yahay
*
Geelu waa halbowlaha naftu, ka hannag leedahay
(Sayid Maxamed Cabdille Xasan)

Gurgurshaagu awr buu ka yahay, rarasho gaadiid
*
Nimanyohow sidii awr gurgura, caynku gubi waayay
(Hadraawi)

Markuu duudka simo geelu waa, dawlad gooniya
(Timacadde)

Ramad geela nin maalay, kibir buu la raftaa
(Cabdilaahi Cabdi ‘Shube’)

Wax badan baan calqado jaan iyo, ku cindanaa geele
Cashar iyo anoo loox dhigtaa, ka carfi roonayd
(Gabyaa aanan magaciisa hayn)

Maggaabada hashaadaa ka roon, maydhaan kale’e
Midigtaadu waxay xoogsataa, maydha gaajada
(Cabdilaahi Suldaan Timacadde)

Hal godlani gujada Yuusufow, way ku gubataaye
Goroflegedka iyo lawyaday, kugu garaacdaaye
Way gaagaxdaa lagama helo, godolka caanaaye
Haddii Eebbe igu kaa galladay, hayska kay gudhin
(Gabyaa aanan helin magaciisa)

• Tweet
• Share
• Share
• Share
• Share

About Farriinta Tixmagabe

Ku mahadsanid soo booqashadaada degelkan, fadlan noo reeb wixii aragti, faallo ama naqdin ah.

Related Post